اسپین کے ورک ویزے کے بارے میں ایک بات ایسی ہے جو سن کر اکثر لوگوں کے چہرے کا رنگ بدل جاتا ہے: یہ درخواست آپ نہیں دیتے۔
جو تصویر ہمارے ہاں ذہن میں بیٹھی ہوئی ہے وہ کچھ یوں ہے — آدمی کاغذ اکٹھے کرتا ہے، اسلام آباد یا کراچی میں سفارت خانے جاتا ہے، فارم جمع کراتا ہے اور انتظار کرتا ہے۔ اسپین کا ورک ویزا اس طرح نہیں چلتا۔ یہاں پہلا قدم اسپین کے اندر اٹھتا ہے، اور اٹھانے والا وہ آجر ہوتا ہے جو آپ کو نوکری دینا چاہتا ہے۔ وہ اپنے صوبے کے امیگریشن دفتر (Oficina de Extranjería) میں آپ کے نام سے کام اور رہائش کی اجازت مانگتا ہے۔ جب تک اسپین میں کوئی آپ کو باقاعدہ نوکری دینے کو تیار نہ ہو، ورک ویزے کا عمل شروع ہی نہیں ہوتا۔
یہ ایک جملہ سمجھ لیں تو آدھی ٹھگی خود بخود پکڑی جاتی ہے۔ جو ایجنٹ کہے "پیسے دو، ورک ویزا لگوا دیتے ہیں” — اس سے صرف ایک سوال پوچھیں: کون سی کمپنی مجھے نوکری دے رہی ہے، اس کا نام کیا ہے، اور میں اس سے خود بات کر سکتا ہوں؟ جواب میں گول مول باتیں آئیں تو معاملہ وہیں ختم سمجھیں۔
پورا عمل کیسے چلتا ہے
پہلے کسی اسپینش کمپنی یا مالک کا آپ کو نوکری دینے پر آمادہ ہونا ضروری ہے۔ عملی طور پر یہ ان شعبوں میں ہوتا ہے جہاں مقامی لوگ ملتے ہی نہیں۔ اس کے بعد ایک چیز دیکھی جاتی ہے جسے Catálogo de Ocupaciones de Difícil Cobertura کہتے ہیں — یعنی وہ پیشے جن کے لیے اسپین میں کارکن ملنا مشکل ہے۔ حکومت یہ فہرست ہر تین ماہ بعد نئی جاری کرتی ہے۔ اگر آپ کا پیشہ اس میں شامل ہے — مثلاً ٹرک ڈرائیور، ویلڈر، بعض تعمیراتی اور زرعی کام، بحری عملہ — تو عمل تیز چلتا ہے۔ نہ ہو تو کمپنی کو پہلے یہ ثابت کرنا پڑتا ہے کہ اس نے مقامی مارکیٹ میں تلاش کیا اور اسے کوئی کارکن نہیں ملا۔ یہ اضافی قدم ہے اور اسی پر بہت سی درخواستیں سست پڑ جاتی ہیں۔
کاغذات مکمل ہوں تو Extranjería کا دفتر کچھ مہینوں میں فیصلہ سناتا ہے۔ جو منظوری ملتی ہے اسے autorización inicial کہتے ہیں۔ اس کے بعد ایک مقررہ مدت کے اندر آپ اپنے ملک میں اسپین کے سفارت خانے یا ویزا سینٹر جا کر ویزے کی درخواست دیتے ہیں — یہاں پاسپورٹ کے علاوہ میڈیکل سرٹیفکیٹ اور پولیس کریکٹر سرٹیفکیٹ درکار ہوتے ہیں۔
اسپین پہنچنے کے بعد کام ابھی ختم نہیں ہوا۔ آپ کو سوشل سیکورٹی میں رجسٹر ہو کر کام شروع کرنا ہوتا ہے، اور مقررہ مدت کے اندر فنگر پرنٹس دے کر اپنا رہائشی کارڈ یعنی TIE بنوانا ہوتا ہے۔ اس آخری مرحلے پر — اپائنٹمنٹ، فیس اور فنگر پرنٹس — ہمارا الگ مضمون موجود ہے، کیونکہ یہی وہ جگہ ہے جہاں لوگ سب سے زیادہ الجھتے ہیں۔
کن پیشوں میں واقعی گنجائش ہے
سچی بات یہ ہے کہ اسپین ہر پیشے کے لیے دروازہ نہیں کھولتا۔ جہاں گنجائش ہے وہاں کھلا کھلا ہے، اور جہاں نہیں ہے وہاں لاکھ کوشش بھی ضائع جاتی ہے۔ ٹرانسپورٹ کے شعبے میں ٹرک اور بس ڈرائیوروں کی کمی مسلسل چلی آ رہی ہے — البتہ یورپی لائسنس کی شرائط پہلے سے معلوم کر لیں، کیونکہ اپنے ملک کا لائسنس وہاں خودبخود نہیں چلتا۔ تعمیرات میں مستری، اسٹیل فکسر، پلمبر، الیکٹریشن اور ٹائل کا کام کرنے والوں کی مانگ رہتی ہے۔ زراعت میں فارم ورکر، خاص طور پر Huelva، Almería، Lleida اور Murcia کے علاقوں میں۔ اور سیاحتی علاقوں کے ہوٹل اور ریسٹورنٹ باورچی، کچن ہیلپر اور ویٹر ڈھونڈتے رہتے ہیں۔
پڑھے لکھے لوگوں کے لیے ایک الگ دروازہ بھی ہے۔ آئی ٹی، انجینئرنگ اور ہیلتھ کیئر میں EU Blue Card کا راستہ موجود ہے، جس کے لیے تسلیم شدہ ڈگری اور ایک اچھی تنخواہ والی آفر درکار ہوتی ہے۔ یہ راستہ کم لوگ آزماتے ہیں، حالانکہ ہمارے ہاں اس کے اہل لوگ کم نہیں۔
اور اگر ہنر ہے ہی نہیں؟ تو ایمانداری کی بات یہ ہے کہ پہلا قدم ویزے کی درخواست نہیں، ہنر سیکھنا ہے۔ جو رقم ایجنٹ کو دینے کا ارادہ ہے، اس کا ایک حصہ کسی مستند ٹریننگ پر لگ جائے تو آپ ایک سال بعد اسی فہرست میں کھڑے ہوں گے جہاں سے راستے کھلتے ہیں۔
تنخواہ اور وہ حق جو کنٹریکٹ کے ساتھ آتے ہیں
اسپین میں کم از کم قانونی تنخواہ (SMI) تقریباً 1,100 یورو ماہانہ سے اوپر ہے اور یہ سال میں چودہ اقساط میں دی جاتی ہے۔ حکومت اس رقم کو وقتاً فوقتاً بڑھاتی رہتی ہے، اس لیے تازہ عدد ہمیشہ سرکاری ذریعے سے دیکھیں۔
کنٹریکٹ پر دستخط کرنے سے پہلے تین چیزیں پڑھ لیں: تنخواہ، اوقاتِ کار اور چھٹیاں۔ یہ تینوں قانون کے مطابق لکھی ہونی چاہئیں۔ ایک قانونی کنٹریکٹ صرف کاغذ کا ٹکڑا نہیں ہوتا — اس کے ساتھ سوشل سیکورٹی، علاج، بیروزگاری الاؤنس اور پنشن میں آپ کا حصہ جڑا ہوتا ہے۔ یہ سب آپ کا حق ہے، مالک کا احسان نہیں۔
جھانسے — یہ حصہ سب سے غور سے پڑھیں
"پیسے دو، کنٹریکٹ بنوا دیں گے۔” اسپین میں جاب کنٹریکٹ بیچنا جرم ہے۔ اور یہ صرف اخلاقی بات نہیں، عملی بات ہے: جعلی کنٹریکٹ پر بنا ویزا آگے چل کر منسوخ ہوتا ہے، اور اس کے بعد آپ کا نام ایک ایسے ریکارڈ میں چلا جاتا ہے جو Arraigo تک کا راستہ خراب کر دیتا ہے۔ یعنی جو رقم آپ نے راستہ کھولنے کے لیے دی تھی، اسی نے دوسرا دروازہ بھی بند کر دیا۔
"ویزا گارنٹی ہے۔” کوئی ایجنٹ، کوئی دفتر، کوئی جاننے والا ویزے کی گارنٹی نہیں دے سکتا۔ فیصلہ صرف اسپین کی حکومت کرتی ہے۔ گارنٹی کا لفظ خود ہی سب سے بڑی نشانی ہے کہ سامنے والا سچ نہیں بول رہا۔
"ڈونکی سے بھیج دیں گے، وہاں پہنچ کر کاغذ بن جائیں گے۔” اس جملے کے پیچھے جو کچھ ہوتا ہے وہ ہم نے الگ مضمون میں کھول کر لکھا ہے — «ڈنکی کا راستہ: پورا سچ»۔ پیسے، جان اور عزت، تینوں اسی ایک جملے پر داؤ لگتے ہیں۔
اور ایک عام اصول: ادائیگی سے پہلے ہر دستاویز خود پڑھیں اور خود تصدیق کریں۔ اصلی عمل میں سرکاری فیسیں چند سو یورو سے آگے نہیں جاتیں۔ جب کوئی لاکھوں روپے مانگے تو وہ ویزے کی قیمت نہیں لے رہا — وہ اس بات کی قیمت لے رہا ہے کہ آپ کو یہ سب معلوم نہیں تھا۔
وقت کتنا لگتا ہے
ایمانداری سے کہیں تو یہ تیز عمل نہیں ہے۔ کمپنی کی درخواست سے لے کر پاسپورٹ پر ویزا لگنے تک عام طور پر کئی مہینے لگتے ہیں، اور یہ مدت دفتر در دفتر بدلتی ہے — کسی صوبے میں کام تیز چلتا ہے، کسی میں سست۔ اس لیے جو بھی آپ سے "دو ہفتے میں ویزا” کا وعدہ کرے، اس کے بارے میں مزید سوچنے کی ضرورت نہیں۔ وہ جھوٹ بول رہا ہے، اور اسے خود بھی معلوم ہے۔
جہاں سے خود تصدیق کریں
- ورک پرمٹ کے سرکاری فارم اور ہدایات: inclusion.gob.es
- شارٹیج پیشوں کی سہ ماہی فہرست: sepe.es (Catálogo de ocupaciones)
یہاں جو کچھ لکھا ہے وہ نظام کو سمجھنے کے لیے ہے، وکیل کی جگہ لینے کے لیے نہیں۔ شارٹیج کی فہرست ہر تین ماہ بعد بدلتی ہے، کم از کم تنخواہ ہر سال نظرثانی سے گزرتی ہے، اور شرائط بھی وقت کے ساتھ تبدیل ہوتی رہتی ہیں۔ اپنی درخواست دینے سے پہلے اوپر دیے گئے سرکاری صفحات سے تازہ حالت دیکھ لیں، یا کسی رجسٹرڈ امیگریشن وکیل سے اپنا کیس دکھوا لیں۔
