لاہور کی سیشن عدالت نے اداکارہ نازش جہانگیر کی عبوری ضمانت منسوخ کر دی ہے جو ان کے خلاف درج فراڈ کے مقدمے کے سلسلے میں دی گئی تھی۔
یہ مقدمہ اداکارہ اذان اسود ہارون کی درخواست پر سیشن عدالت لاہور میں زیر سماعت تھا۔ سماعت کے دوران، عدالت نے اداکارہ نازش جہانگیر کی عدم پیروی کی بنا پر ان کی عبوری ضمانت منسوخ کر دی۔ اس کے برعکس، مقدمے میں شریک ملزم سکندر کی عبوری ضمانت میں اکتوبر کے پہلے ہفتے تک توسیع کر دی گئی ہے۔
اداکارہ نازش جہانگیر کے خلاف یہ مقدمہ تھانہ ڈیفنس سی میں اداکارہ اذان اسود کی جانب سے درج کروایا گیا تھا، جس میں ان پر فراڈ کا الزام عائد کیا گیا ہے۔
ایف آئی آر کے مطابق، اداکارہ نازش جہانگیر نے اذان اسود سے 25 لاکھ روپے اور ایک گاڑی دو ماہ کے لیے قرض لی تھی، مگر بعد ازاں رقم اور گاڑی دونوں واپس نہیں کیے۔ عدالت میں اس معاملے کی پیروی نہ کرنے کے باعث ان کی عبوری ضمانت کو ختم کر دیا گیا۔
