59 لاکھ افراد بیروزگاری کا شکار، ملک میں بیروزگاری کی شرح بڑھ کر 7.1 فیصد ہوگئی
قومی لیبر فورس سروے 2024-25 کے نتائج جاری کر دیے گئے ہیں۔
سروے کے مطابق پاکستان میں بیروزگاری کی شرح بڑھ کر 7.1 فیصد تک پہنچ گئی ہے، جبکہ 2020-21 میں یہ شرح 6.3 فیصد تھی۔ اس طرح گزشتہ پانچ برسوں میں بیروزگاری میں مجموعی طور پر 0.8 فیصد اضافہ ہوا ہے۔ ملک میں اس وقت تقریباً 59 لاکھ افراد بیروزگار ہیں۔
سروے میں بتایا گیا ہے کہ 2023 کی مردم شماری کے مطابق پاکستان کی کل آبادی 24 کروڑ 14 لاکھ 90 ہزار ہے، جن میں سے 3.3 فیصد افراد بیروزگار ہیں۔
روزگار فراہم کرنے کے اعتبار سے سروسز سیکٹر پہلے نمبر پر ہے، اس کے بعد زرعی شعبہ اور پھر صنعتی شعبہ آتا ہے۔
- سروسز سیکٹر میں 3 کروڑ 18 لاکھ 30 ہزار افراد کام کر رہے ہیں، جو کل روزگار کا 41.7 فیصد بنتا ہے۔
- زرعی شعبے میں روزگار کی شرح 33.1 فیصد ہے اور یہاں 2 کروڑ 55 لاکھ 30 ہزار افراد کام کرتے ہیں۔
- صنعتی شعبے میں روزگار کی مجموعی شرح 25.7 فیصد ہے، جہاں 1 کروڑ 98 لاکھ 60 ہزار افراد ملازم ہیں۔
سروے کے مطابق پاکستان میں فی کس ماہانہ اوسط اجرت 39 ہزار 42 روپے ہے۔ گزشتہ پانچ سال میں اوسط اجرت میں 15 ہزار 14 روپے کا اضافہ ہوا ہے، جبکہ 2020-21 میں یہ رقم 24 ہزار 28 روپے تھی۔
مزید یہ کہ مردوں کی اوسط ماہانہ اجرت 39 ہزار 302 روپے اور خواتین کی اوسط اجرت 37 ہزار 347 روپے ریکارڈ کی گئی ہے۔
