پاکستان کے چیف آف آرمی سٹاف، جنرل سید عاصم منیر نے کہا ہے کہ معاشرے میں مایوسی پھیلانے کی ناکام کوششیں کرنے والے افراد کو تمام اسٹیک ہولڈرز کی مشترکہ کوششوں سے شکست ہو چکی ہے۔
فوج کے شعبہ تعلقات عامہ (آئی ایس پی آر) کے جاری کردہ بیان کے مطابق، آرمی چیف جنرل عاصم منیر نے کراچی کا دورہ کیا اور تاجر برادری سے ملاقات کی۔ اپنے خطاب میں، انہوں نے پاکستان کی معاشی بحالی میں چین، سعودی عرب، اور متحدہ عرب امارات جیسے دوست ممالک کی مختلف شعبوں میں مدد کی تعریف کی۔ انہوں نے کہا کہ پاکستان کے پاس مختلف شعبوں میں بے پناہ صلاحیتیں موجود ہیں، اور قوم کو ملک کے روشن مستقبل پر مکمل اعتماد ہونا چاہیے۔
آرمی چیف نے مزید کہا کہ ملک اللہ کے حکم سے اپنے حقیقی مقام تک پہنچے گا۔ ان کا کہنا تھا کہ منفی پروپیگنڈا کرنے والے عناصر ناکام ہوچکے ہیں، اور پاکستان کی تمام کمیونٹیز کی مشترکہ کوششیں ملک کو کامیابی کی جانب لے جا رہی ہیں۔
جنرل عاصم منیر نے کراچی کی کاروباری برادری سے بھی ملاقات کی اور ملک کی اقتصادی ترقی میں ان کے کردار کو سراہا۔ شرکاء نے سپیشل انویسٹمنٹ فسیلیٹیشن کونسل (SIFC) کی کارکردگی کی تعریف کی اور ملکی معیشت میں مثبت پیش رفت پر اطمینان کا اظہار کیا۔ ان کا کہنا تھا کہ SIFC مزید معاشی ترقی کے لیے سازگار ماحول فراہم کر رہی ہے۔
آئی ایس پی آر کے اعلامیے کے مطابق، آرمی چیف نے کراچی میں ’انوویسٹا انڈس آئی ٹی پارک‘ کا بھی افتتاح کیا۔ یہ پارک پاکستان کے نوجوانوں کو انفارمیشن ٹیکنالوجی، خصوصاً مصنوعی ذہانت کے شعبے میں تعلیم اور صنعت کے درمیان تعاون کو فروغ دینے کے لیے قائم کیا گیا ہے، جو ملکی معیشت کے لیے ایک اہم پیش رفت ہے۔
